2000年播映的剧集《寻秦记》，简直系一代人的回忆，由一众主角古天乐、宣萱、林峰、郭羡妮，到首主题曲「天命最高～～」样样都系经典，亦都系古天乐心目中的最爱。

到古生做老板开电影公司天下一，上年已讲明买定版权会开拍个电影版，直至今年《影视博览》又有进一步消息，宣布已落实开拍，将由原班人马古天乐、林峰及宣萱担任主角，并由新晋导演黎震龙执导。原班人马喎，听见就兴奋，咁除左主角，一众配角又有冇份先？

《寻秦记》系古天乐在无线最后一套剧，亦系最有代表性一套

三大主角都集齐，系咪就满足到一众「寻迷」的要求呢？当电影版消息一出，网民就针对「原班人马」呢个卖点，希望唔止三位主角齐脚，最好一众配角都齐齐整整登场。而众多配角中，你又最想边位可以出现呢？

江华的眼神，赢在太有自信！

连晋／嫪毒 江华

一套剧点可以冇歹角，而《寻秦记》的最重要歹角就一定系由江华饰演的连晋，后来被逐出巨鹿候府，后来右手更被项少龙所废，要忍辱负重向左手神剑剑客嫪毒练左手剑法。最奸系，学成后索性将对方杀死，自己改名换姓成为嫪毒。呢个角色江华演得非常入血，嗰种不可一世及傲气，令佢折堕时更加好睇。不过作为电影版又好难叫番江华演，搵刘华又得唔得？横掂动静都一样。

当年的郭羡妮绝对靓绝，如果再演琴清应该都唔输蚀

琴清　郭羡妮

郭羡妮在剧中要一人分饰两角，不过现代版的秦青，出左一集就冇下文，随后就由琴清身份现身，在秦代满足项少龙对女朋友的思念，最后更同宣萱饰演的乌廷芳两女共侍一夫，享齐人之福。其实要搵郭羡妮重演角色都唔难，不过须知道合拍片就系要预留一啲角色俾内地演员参与，要让出琴清一角都唔奇。

赵倩本来同项少龙有得共偕连理，但惨被连晋杀害

赵国公主赵倩　雪儿

雪儿跟古仔在《创世纪II》已经有合作，连带去到《寻秦记》饰演一对。二人原来有段美好姻缘，可以共偕连理，但就因为得知连晋计划杀害项少龙的秘密，而惨遭灭口。虽然雪儿早就退出影坛，但古天乐上年就主动搵番呢位老朋友出来，在《杀破狼 ‧ 贪狼》中亮相，即使戏份唔多，不过已经凡事都有可能，只要古生出句声，齐章话咁易。

欧瑞伟饰演的陶总管，真系庄谐并重

陶总管 欧瑞伟

其实《寻秦记》中，有一个角色都非常重要，就系听命乌廷芳，经常跟项少龙一齐的陶总管。角色本来一脸正经，但每当项少龙讲出一啲现代说话时，佢会好认真咁学习嘅样，真系非常好有喜感。对于有冇机会原班人马上阵，《香港01》就致电欧瑞伟查问，KC表示未有收到通知︰「如果有份就最好啦，哈哈……我都想再做多次陶总管，呢个角色自己都好锺意，咁大嘅製作系演员都想啦！」希望古生听到呢番话，等陶总管都有机会杀入大银幕啦！

,